Këshilla praktike për higjienën e lëkurës dhe të këmbëve

Higjiena e lëkurës dhe e këmbëve

Myqet gjenden kudo rreth jush - në ajër, në tokë, ujë dhe bimë. Gjithashtu, disa prej tyre gjenden në lëkurën tuaj dhe mund të jenë të dobishme ose të dëmshme. Për shkak se shmangia e tyre është shumë e vështirë, infeksionet mykotike janë mjaft të përhapura. Myqet e dëmshme mund të shumohen shumë në lëkurë, sidomos kur sistemi juaj imunitar është i dobësuar. 

Llojet më të zakonshme të infeksioneve mykotike përfshijnë: infeksionin mykotik të këmbëve, infeksionet mykotike të thonjve, infeksionin mykotik të ijëve, dermatofitozën dhe infeksione të tjera mykotike. Këto sëmundje janë ngjitëse, pasi infeksionet mykotike mund të kalojnë nga një pjesë e trupit tek tjetra nëpërmjet kruajtjeve, si dhe nga një person tek tjetri. Kjo e fundit ndodh jo vetëm me anë të kontaktit me lëkurën, por edhe nëpërmjet ndarjes së veshjeve apo peshqirëve dhe kontaktit me sipërfaqet dhe objektet e kontaminuara. Kjo është arsyeja se pse mbajtja e një higjiene të mirë personale është tepër e rëndësishme për parandalimin e sëmundjeve mykotike të lëkurës.  

Praktikat e mira të higjienës mund të ndihmojnë në reduktimin e rrezikut të infeksioneve mykotike, në ndalimin e rishfaqjes së infeksioneve si dhe në parandalimin e përhapjes së tyre. Është mirë të mbani parasysh se funget lulëzojnë në mjedise të ngrohta dhe të lagështa, prandaj këshilla kryesore parandaluese është ta mbani lëkurën të pastër dhe të thatë. 

Nëse keni higjienë të pamjaftueshme, p.sh. nëse ju djersiten shumë këmbët apo nëse nuk thaheni mirë pas dushit apo banjës, mund të jeni më të rrezikuar nga infeksionet mykotike. 

Mbajtja e veshjeve të pastra mund të ndihmojë gjithashtu në parandalimin e infeksioneve. E njëjta gjë vlen edhe për çarçafët të cilët mbajnë lagështi për shkak të djersitjes gjatë natës – ndërrojini rregullisht për të mos lejuar krijimin e një vatre të ngrohtë për lulëzimin e infeksioneve mykotike.  

Inkfesionet mykotike janë të zakonshme në ambientet e përbashkëta të veshjes si në pishina, palestra dhe dushe apo në zonat me lagështi konstante dhe nxehtësi. Për të parandaluar marrjen e infeksioneve mykotike në këto vende, këshillohet gjithmonë të jeni tepër të kujdesshëm. Për shembull, rekomandohet të siguroheni që të vishni gjithmonë shapka në dushet e përbashkëta. Gjithashtu, nuk duhet t'i ndani asnjëherë peshqirët me të tjerë. Merrni gjithmonë peshqirin tuaj personal të cilin duhet ta lani dhe ta thani në shtëpi pas përdorimit në një ambient të përbashkët. 

Kujdesuni për këmbët tuaja për të parandaluar ose për të frenuar rishfaqjen e infeksioneve mykotike si infeksioni mykotik i këmbëve. Ndiqni këto këshilla të thjeshta:

Këpucët dhe çorapet:

• Zgjidhni çorape që nuk shkaktojnë djersitje. Rekomandohen çorapet e pambukta.

• Shmangni këpucët që pengojnë ajrosjen e këmbëve ose që ju shtrëngojnë te thonjtë.

• Mbani sandale ose shapka në dhomat e dusheve në palestër dhe në pishina për të parandaluar infeksionin.

• Hiqini këpucët në shtëpi që t'i lini këmbët të ajrosen.

Kujdesi për këmbët dhe thonjtë:

• Shmangni përdorimin e aksesorëve të njëjtë për thonjtë e shëndetshëm dhe ata të infektuar.

• Kujdesuni për thonjtë e gishtave të këmbëve duke i mbajtur të prerë dhe të pastër.

• Nëse i dispononi, merrni me vete në sallon aksesorët tuaj personalë të thonjve si gërshërët, prerëset e thonjve, limat, mjetet e rrojes dhe pajisjet e lëmimit.

• Sigurohuni që mjetet në sallonin tuaj të thonjve të jenë pastruar dhe sterilizuar pas përdorimit me klientë të tjerë.