Shëndeti vaginal: çfarë duhet të dini 

Sëmundjet e organeve gjenitale: nga se duhet të bëjmë kujdes dhe pse

Shëndeti intim ndikon tek të gjitha gratë, por është një temë që ende nuk trajtohet mjaftueshëm. Mos harroni asnjëherë se nuk jeni vetëm dhe se shëndeti juaj intim nuk duhet t'ju bëjë të ndiheni në siklet. Sëmundjet vaginale si kandidoza janë të lehta për t'u trajtuar, ndërkohë që nëse lihen të patrajtuara mund të shkaktojnë shqetësime. Për këtë arsye rekomandohet gjithmonë që të kujdeseni mirë për zonat tuaja intime si dhe të kërkoni një konsultë mjekësore sa herë që ndjeni ndonjë shqetësim.

Arsyeja se pse rekomandohet kujdes i veçantë për zonat intime është se vagina është një mjedis tepër i prirur për zhvillimin e mikrobeve. ekuilibri i vaginës është i ndryshëm nga ai në pjesët e tjera të trupit, prandaj niveli i tij mund të pësojë çrregullime edhe nga përdorimi i sapunëve të fortë. 

Infeksionet e organeve gjenitale mund të fillojnë me kruarje midis këmbëve ose me sekrecione të pazakonta dhe zakonisht me erë. Nëse i vëreni këto simptoma, kini parasysh se nuk është mirë t'i mbani të fshehura me shpresën se do të zhduken vetvetiu. Mos u stresoni pasi këto sëmundje janë të zakonshme dhe zakonisht të lehta për t'u trajtuar, por është gjithmonë e këshillueshme që herën e parë qe vëreni diçka të pazakontë të kërkoni ndihmën e gjinekologut.

Nëse nuk e njihni mirë trupin tuaj, mund ta keni të vështirë të dalloni nëse kanë ndryshuar sekrecionet vaginale. Mund të mendoni edhe se vetë fakti që keni sekrecione është shenjë infeksioni. Megjithatë, sekrecionet e zakonshme (të qarta ose të bardha) janë një shenjë normale që tregon se vagina juaj është e shëndetshme. Trupi juaj prodhon sekrecione në mënyrë që vagina të mund të vetëpastrohet dhe të vetëlubrifikohet. Nga ana tjetër, sekrecionet me erë të ndryshme në ngjyrë mund të jenë tregues i një infeksioni.